تأثير الصيام على البزنس: إزاي تقلل الخساير وتزود أرباحك في رمضان

900x450_uploads%2C2019%2C04%2C13%2C121a525e05.jpg

رمضان ليه معاني جميلة كتير عند المصريين : عبادة ، أكل لذيذ ، خروجات وسهرات لحد الفجر ومسلسلات. باختصار ، رمضان يعني أنتخة

الحقيقة إن في دراسة بتقول إن رمضان بيؤثر إيجاباً على نفسية الناس ، لأننا بنتعبد ونساعد الفقراء ، بنحس إننا أحسن

ولكن محدش بيتكلم عن الجوانب التانية اللي بتيجي مع رمضان

اللهم إني صائم

اللهم إني صائم هي شعار المرحلة. لو إنت محتاج تخلص شغل أو ورق حكومي، يبقى أكيد عارف إن الحاجة اللي بتخلص في يوم هتاخد 3 أيام على الأقل في رمضان. الحقيقة المرة إن الصيام وقلة النوم بتضعف قدرة الموظف على الإنتاج. متستناش 80% إنتاجية من موظف معندهوش 50% طاقة ، ولذلك أرباب العمل بيتجهوا لتقليل ساعات العمل ساعة أو اتنين خلال رمضان

طب وده معناه إني هخسر في رمضان؟

لو أنت صاحب عمل في مجال الأغذية ، المولات ، الكافيهات ، المطاعم أو بيع بالتجزئة ، مش هتخسر في رمضان ، وده عشان الناس بتميل للشراء بزيادة فوق احتياجاتهم في رمضان. كل اللي عليك إنك تجهز بضاعتك قبل رمضان وقبل العيد ، رمضان موجة بتزيد فيها الأرباح في السوق ، يا لحقتها يا ملحقتهاش

مجال المنتجات الغذائية

مش معنى إن الناس صايمين عن الأكل إنهم مش هيستهلكوا أكل كتير ، بالعكس الناس بيميلوا للشراء بزيادة فوق احتياجاتهم خلال الشهر الكريم. وأكتر بزنس بيكسب بعد السوبرماركت طبعا هو المطاعم. المصريين بيحبوا الأكل وبيحبوا أكتر الأنتخة ، ليه نطبخ لما ممكن نشتري من بره؟ وده مش مقتصر على وقت الفطار بس ، ده كمان ممتد لبعد الفطار حتى وقت السحور. لذلك أي صاحب سوبر ماركت ، مطعم أو كافيه عارف إن رمضان وقت القبول على البزنس بتاعه

البيع بالتجزئة retail

الشغل مبيقفش في رمضان بالنسبة لبراندات الملابس ومستحضرات التجميل. السيدات دايما بيدوروا على ستايل مناسب للشهر الكريم ينفع لوقت الفطار أو السحور ، لذلك هتلاقي البراندات بتتنافس على اللي هياخد أكبر حصة من إقبال المشتريات على كولكشن رمضان. أما بالنسبة لقبل العيد فده الهدف الأساسي لمعظم البراندات . هتلاقيهم بيقدموا خصومات حصرية لعملائهم عشان يجذبوهم للكولكشن بتاعتهم

السوشيال ميديا

أي حد معاه سمارت فون بيقعد على السوشيال ميديا في رمضان أكتر من أي وقت ، وده عشان ساعات العمل الأقل في الصيام والسهر لحد الفجر. عشان كده هتلاقي تركيز شركات كتير كبيرة على السوشيال ميديا في رمضان ، أكبر دليل على كده إن بيبسي وكوكاكولا غيروا تركيز إعلاناتهم في رمضان من التليفزيون للسوشيال ميديا ، لإن أغلبية العملاء هناك وده انسب مكان توصلهم عن طريقه

ولو البزنس بتاعك مختلف عن اللي فوق

المتوقع إن هيبقى في هدوء في حركة السوق خلال رمضان ، لازم تلحق تعمل مبيعاتك قبل ما رمضان يبدأ ، ولو في شغل اتأخر لأول رمضان ، إدي فترة سماح لأفراد شركتك والشركة اللي بتتعامل معاها لحد ما الناس تتعود على الصيام. أما خلال الشهر الكريم ، ركز على تجهيز البزنس بتاعك للموجة اللي بعد العيد

وافتكر النصايح دي خلال الشهر الكريم

ساعات العمل بتبقى من 6 ل 7 ساعات ، أنسب فترة إنك تكلم حد هي فترة الظهر

لو محتاج تشحن بضاعة ، يفضل تعملها بعد الفطار مش قبله

زود حجم إعلاناتك على السوشيال ميديا خلال رمضان على الأقل 20 في المية

اعرض أحسن حاجة عندك بأحسن خصم في رمضان

قدم منتج ليه علاقة بالشهر الكريم

رمضان يعني المشاركة : اعرض صور لشركتك وهي بتقدم أعمال خيرية

Amr Ayman